ولیم (بل) لووینبرگ ڈاخاؤ حراستی کیمپ کے ذیلی کیمپ کوفرنگ میں جبری مشقت کا حال بیان کرتے ہیں

44 کے اختتام اور 45 کے آغاز کے دوران، مجھے معلوم ہے کہ یہ سردیاں تھیں، بہت زیادہ ٹھنڈ تھی، مجھے یاد ہے۔ اُنہوں نے لاشوں کو نذر آتش نہیں کیا، ہمیں اُن لاشوں کو اجتماعی قبروں میں دفنانا تھا۔ ہمارے پاس وہ سامان ڈھونے والی ٹرالیاں تھیں۔۔ آپ نے اُن کو بہت سی تصاویر میں دیکھا ہو گا۔ اُن ٹرالیوں میں لاشوں کے ڈھیر ہوتے تھے۔ اور مجھے یاد ہے کہ ہمیں ایک میل سے زیادہ چلنا پڑتا تھا، شاید اس سے بھی کچھ زیادہ۔ اور یہ پہاڑی راستہ تھا کوئی میدانی علاقہ نہیں تھا۔ اور قیدی یعنی ہمارے لوگ اس قدر خستہ حالت میں تھے، بہت دبلے، وہ بہت ہی مشکل سے چل پاتے تھے۔ ہمیں یہ کام کرنا پڑتا تھا اور میں اُن میں سے ایک تھا۔ اُنہوں نے ہمیں پیٹنا شروع کر دیا کیونکہ ہم زیادہ تیز نہیں چل سکتے تھے۔ یہ غیر معمولی نہیں تھا، یہ روز کا معمول تھا۔ جب وہ شخص کچھ لڑکوں کو پیٹ رہا تھا جو بہت کمزور تھے تو میں نے اُس سے کچھ کہا۔ اُس نے مجھے مارنا شروع کر دیا۔ ہم اُس وقت بہت زیادہ پریشان تھے۔ ہم جانتے تھے کہ صرف کچھ وقت کی بات ہے اور ہم کبھی زندہ نہیں بچ سکیں گے۔ اُنہوں نے یہ بات ہمیں بتا بھی دی تھی۔ اُنہوں نے کہا، "اگر ہم تمہیں زندہ رہنے دیں گے تو تم ہمیں مار ڈالو گے۔ لہذا بہتر یہ ہے کہ ہم تم سب لوگوں کو ختم کر دیں۔" وہ اس طرح کی باتیں کرتے رہتے تھے جو ظاہر سی بات ہے۔ اور ہم 45 کے شروع میں بہت زیادہ پریشان تھے، خوراک بہت ہی کم تھی۔ جرمن اتنے لوگوں کو ہلاک کرنا چاہتے تھے جن کو وہ کر سکتے تھے۔ وہ کچھ پریشان بھی تھے کیونکہ اُن کے جنگی وسائل ختم ہو رہے تھے۔ لہذا اُنہوں نے ہمیں زیادہ مشقت کرنے پر مجبور کیا اُن فیکٹریوں کیلئے جنہیں وہ اب بھی مکمل کرنا چاہتے تھے۔ بادی النظر میں مجھے یقین ہے کہ اُن پر ٹھیکیداروں کا بہت دباؤ ہو گا جو اُن کیلئے کام کر رہے تھے۔ وہ ہم سے جس قدر مشقت لے سکیں، لینا چاہتے تھے۔ یہ بہت مشکل تھا، بہت سے لوگ ہلاک کر دئے گئے۔