یہودی بے گھر لوگوں کیلئے بڑے کیمپ، 1945-1946

دوسری جنگ عظیم کے اختتام کے ساتھ ہی لاکھوں بچ جانے والے یہودی بے گھر لوگوں کے کیمپوں میں رہے۔ اتحادیوں نے ایسے کیمپ اپنے مقبوضہ جرمنی، آسٹریا اور اٹلی میں ان پناہ گزینوں کیلئے قائم کئے تھے جو یورپ سے روانگی کے انتظار میں تھے۔ اکثر یہودی بے گھر افراد نے یورپ کو چھوڑ کر فلسطین ہجرت کرنے کو ترجیح دی لیکن بہت سے یہودی امریکہ بھی جانا چاہتے تھے۔ اُنہوں نے اُس وقت تک بے گھر افراد کے کیمپوں میں رہنے کا فیصلہ کیا جب تک کہ وہ یورپ سے روانہ نہ ہو پائیں۔ 1946 کے اختتام تک یہودی بے گھر افراد کی تعداد تقریباً 250،000 تھی جس میں سے 185،000 جرمنی میں، 45،000 آسٹریا میں اور 20،000 اٹلی میں تھے۔ اکثر بے گھر یہودی پولینڈ کے پناہ گزین تھے۔ ان میں سے بہت سے جنگ کے دوران جرمنی سے بھاگ کر سوویت یونین کے داخلی حصوں کی طرف چلے گئے۔ دوسرے بے گھر یہودی چیکوسلواکیہ، ہنگری اور رومانیہ سے آئے تھے۔