سام اشپیگل ایک جبری مشقت کے کیمپ کی صورت حال بتاتے ہیں

ہمیں کھانا صبح ملتا تھا۔ ہمیں تقریبا چار بجے صبح اٹھنا ہوتا تھا اور باہر ٹھہرنا پڑتا تھا۔ وہ اسے ایپیل کہتے تھے کیونکہ وہ ہر صبح ہماری گنتی کرتے تھے اور اگر کوئی غائب ہوتا تو ہمیں اس وقت تک باہر کھڑا ہونا پڑتا تھا جب تک کہ وہ شخص مل نہ جاتا۔ اس سے کوئی فرق نہیں پڑتا تھا کہ باہر بارش ہورہی ہے یا سردی پڑرہی ہے۔ بعض اوقات رات کے وقت کوئی مرجاتا تھا لہذا وہ باہر نہیں آ سکتا تھا یا کسی کے ساتھ کچھ ہوجاتا تو وہ باہر نہیں آتا۔ لیکن کچھ بھی ہوجائے ہمیں انتظار کرنا پڑتا تھا۔ جب تک ہماری گنتی نہ ہو جاتی ہم کام پر نہیں جا سکتے تھے۔ پھر ہمیں پانچ یا شاید چار میل پیدل چل کر کیمپ سے فیکٹری پہنچنا ہوتا تھا۔ ہمارے گيٹ سے نکلتے وقت اور رات کو واپس آتے وقت گیٹ کے قریب موسیقی بجائی جاتی۔ ہمیں روٹی کا ایک چھوٹا سا ٹکڑا دے دیا جاتا۔ تقریباً ہم میں سے چھ افراد کو ایک پونڈ روٹی ملتی۔ اور وہ روٹی ایسی بنی ہوتی کہ آپ اس کے اندر بھوسا اور چوکر کو محسوس کرسکتے تھے۔ آپ کیلئے اُسے کھانا بہت ہی مشکل ہوتا۔ لیکن ہمیں ہرحال میں اسے کھانا پڑتا کیونکہ زندہ رہنے کے لئے کچھ تو کھانا ہی تھا۔ اِس کے علاوہ ہمیں ایک اور چیز بھی ملتی جو چائے سے مشابہہ ہوتی۔ وہ کہتے کہ یہ بہت ہی خاص چیز ہے۔۔ بہت ہی خاص چائے ہے۔ ہم وہ تھوڑی سی پی لیتے۔ پھر دن کے درمیانی حصے میں ہمیں تھوڑا سا سوپ دیا جاتا جو پانی ہی ہوتا تھا۔ اور پھر رات کو جب ہم کام سے واپس آتے تو یا تو ہمیں تھوڑا سا سوپ یا روٹی کا ایک اور ٹکڑا دے دیا جاتا۔ یہ ہمارے پورے دن کی غذا تھی۔