چیم اینگیل سوبی بور میں بغاوت اور اپنے فرار کے بارے میں بتاتے ہیں

ہم جانتے تھے کہ وہاں پہلے ہی بہت سے جرمن قتل کئے جا چکے تھے۔ ہم پہلے ہی جانتے تھے کہ بغاوت جاری ہے۔ لہذا ہم اُمید کر رہے تھے کہ کوئی بھی شخص غیر متوقع طور پر اس جگہ نہیں آئے گا جہاں اُسے نہیں آنا چاہئیے اور یہ نہیں جاننا چاہئیے کہ وہاں کیا ہورہا ہے۔ کیونکہ اگر ایسا ہوا تو پھر ہم سب قتل کردیئے جائیں گے۔ لیکن بہرحال ہم لوگ خوش قسمت تھے۔ جہاں ہم کام کررہے تھے وہاں ہم نے جرمنوں کو جان سے مار دیا اور یہ سب ہم نے منصوبے کے مطابق کیا حتی کہ ہم بڑے گیٹ تک پہنچ گئے۔ لوگ ہر طرف بھاگ رہے تھے لہذا سارے کیمپ نے یہ جان لیا کہ کیا ہورہا ہے اور بہت سے لوگوں کے پاؤں بارودی سرنگوں پر پڑ گئے اور یوں وہ ہلاک ہو گئے۔ کچھ لوگ چپ چاپ کھڑے رہے۔ وہ حوصلہ ہار بیٹھے۔ وہ بھاگنا نہیں چاہتے تھے۔ اُنہوں نے بس ہمت چھوڑ دی۔ وہ صرف انتظار کرتے رہے حتی کہ وہ لوگ قتل کردئے گئے۔ ان میں سے اکثر لوگ نوجوان تھے۔ جن کے اندر بھاگنے کی ہمت تھی وہ بھاگ گئے۔ ان میں سے بہت سے لوگ بڑے گیٹ کی طرف بھاگے۔ اب ہم نے بھاگنا شروع کیا۔ ایک بیرک کے سامنے پہنچنے کے بعد میں نے [ایس۔ ایس سارجنٹ کارل] فرینزل کو مشین گن کے ساتھ دیکھا اور اس نے گولی چلانی شروع کردی۔ اکثر لوگ دوڑ رہے تھے۔ میں مشین گن کے خوف سے واپس جانا چاہتا تھا کیونکہ یوں لگا کہ "یہاں موت لکھی ہے۔ یہاں کچھ ہونے والا ہے۔" لہذا میں نے سیلما کا ہاتھ تھاما اور ہم کسی نہ کسی طرح گیٹ سے باہر نکل گئے۔