شارلین شیف ہولوکاسٹ کے بعد امریکہ میں داخل ہونے سے متعلق مشکلات بیان کرتی ہیں

میں ذاتی حوالے سے بات کرتے ہوئے بتاتی ہوں اور میں جانتی ہوں کہ میں اکیلی نہیں ہوں۔ میں ایک یتیم، جنگی قتل و غارت گری کی ناقابلِ بیان تکالیف سے بچنے والی ایک انسان تھی اور کوئی بھی ایسا نہیں تھا جس نے جنگ کے دوران مدد کا ہاتھ بڑھایا ہو۔ اور اب جنگ کے بعد کیا آپ نہیں سمجھتے کہ ہمارے لئے سب سے مقدم یہ چیز تھی کہ ہم جرمنی سے چلیں جائیں؟ لیکن نہیں، مجھے مزید تین سال انتظار کرنا پڑا۔ وہاں جانے والوں کے لئے کوٹا تھا۔ وہاں جانے والوں کے لئے ہمیشہ کوٹا ہوتا تھا۔ امریکہ میں داخل ہونے کے لئے بھی کوٹا تھا۔ آخر میں جب میں نے امریکہ اپنے خاندان کو تلاش کر لیا -- کیونکہ مجھے اپنی دادی کا پتہ یاد تھا-- اُنہوں نے اِس بات کی ضمانت دی کہ میں امریکی حکومت پر بوجھ نہیں بنوں گی۔ اِس کے باوجود مجھے امریکہ آنے کی اجازت حاصل کرنے کیلئے تین برس کا طویل انتظار کرنا پڑا۔ اسی دوران میں نے اسٹوڈنٹ ویزا حاصل کرنے کی بھی کوشش کی اور میں تقریباً ایک برس سے زائد عرصے تک ہائیڈل برگ یونیورسٹی جاتی رہی کیونکہ اِس طرح مجھے اسٹوڈنٹ ویزا مل سکتا تھا۔ مجھے یہ بات ضرور کہنی چاہیئے کہ ہائیڈل برگ یونیورسٹی میں لوگ مجھے رکھنے کیلئے مقدور بھر کوشش کرتے رہے۔ وہاں میرے تعلیمی ریکارڈ میں ایک طرح کا رسمی خلاء موجود تھا۔ حقیقتاً تو کوئی خلاء نہیں تھا مگر مجھے کچھ امتحان دینے پڑے اور اُنہوں نے میری مدد کی۔ یوں مجھے کل وقتی طالب علم کی حیثیت سے تسلیم کر لیا گیا۔ میں یہ کبھی نہیں بھول سکتی۔ میں اِس کیلئے شکرگزار ہوں۔ لیکن پھر بھی مجھے امریکہ آنے کیلئے تین برس کا انتظار کرنا پڑا اور میں سمجھتی ہوں کہ ہمارے ساتھ ایسا سلوک کرنا کوئی اچھی بات نہیں تھی۔