وارسا یہودی بستی سے اور اس میں جلاوطنیاں

وارسا یہودی بستی میں جلاوطنیاں

جنوری اور مارچ 1941 کے درمیان، وارسا کے مغرب میں چھوٹی برادریوں کے یہودیوں کو وارسا کی یہودی بستی میں جلاوطن کر دیا گیا۔ اپریل اور جولائی 1942 کے درمیان وارسا کے مشرق میں واقع قریبی قصبوں سے، جرمنی سے اور جرمنی کے زیر قبضہ مغربی پولینڈ کے علاقوں سے یہودیوں کو وہاں جلاوطن کر دیا گیا۔ جرمنوں نے کئی سو روما (خانہ بدوشوں) کو بھی وارسا کی یہودی بستی میں جلا وطن کردیا۔

اس کے عروج کے دوران، وارسا یہودی بستی کی کل آبادی ،400,000 افراد سے تجاوز کر گئی۔ یہودی بستی میں دانستہ طور پر جرمن پالیسیوں کی وجہ سے خراب حالات وقت کے ساتھ مزید خراب ہوتے گئے۔

وارسا یہودی بستی سے جلا وطنیاں

جولائی اور ستمبر 1942 کے درمیان، جرمن SS اور پولیس یونٹوں نے، غیر جرمن معاونین کی مدد سے، وارسا یہودی بستی سے تقریباً 265,000 یہودیوں کو موت کے گھاٹ اترنے کے لئے ٹریبلنکا قتل گاہ میں جلا وطن کردیا۔ جرمن SS اور پولیس اہلکاروں نے یہودیوں کو اپنے گھروں یا کام کی جگہوں سے Umschlagplatz (حراستی مقام) کی طرف بڑھنے پر مجبور کرنے کے لیے تشدد سے کام لیا۔ وہاں سے، انہوں نے یہودیوں کو وارسا-بیالسٹوک ریل لائن پر، مالکینیا جانے والی مال بردار بوگیوں پر سوار ہونے پر مجبور کیا۔ جب ٹرینیں میکینیا پہنچیں تو انہیں ایک خصوصی ریل اسپر کے ساتھ ٹریبلنکا کی طرف موڑ دیا گیا۔

جرمنوں نے مطالبہ کیا کہ یہودی کونسل (جوڈينرات) کے ارکان ملک بدری کے انتظام میں مدد کریں۔ وارسا میں یہودی کونسل کے سربراہ ایڈم سیزرنیاکو نے تعاون کرنے سے منع کر دیا۔ اگرچہ سیزرنیاکو نے جرمنوں کے خلاف مزاحمت کا مطالبہ نہیں کیا، لیکن اس نے ملک بدری کے حکم کو منظور کرنے سے انکار کر دیا اور 23 جولائی 1942 کو سائینائیڈ کیپسول نگل کر اس نے خودکشی کر لی۔

عمومی طور پر جرمنوں اور ان کے معاونین نے شہر کے ایک بلاک کو گھیرے میں لے کر اور رہائشیوں کو منظم طریقے سے سڑکوں پر نکلنے پر مجبور کر کے یہودیوں کو پکڑ لیا۔ اس کے بعد انہوں نے بھاری پہرے کے اندر یہودیوں کو امشلاگپلاٹز کی طرف مارچ کرنے پر مجبور کیا۔ جیسے ہی ایک بلاک صاف ہو جاتا، جرمن SS اور پولیس یونٹ اور ان کے معاون اگلے بلاک کو محفوظ کرلیتے اور اس عمل کو دہراتے۔ جرمن SS اور پولیس اہلکاروں نے یہودیوں کو زیادہ تیزی سے آگے بڑھانے کے لیے بری طرح مارا پیٹا اور ان پر تشدد کیا؛ انہوں نے ان لوگوں کو گولی مار دی جو چلنے سے قاصر تھے یا جو آگے جانا نہیں چاہتے تھے۔ یہودیوں کو چھپنے کی جگہ سے باہر آنے کے لیے آمادہ کرنے کے لیے، جرمن حکام اکثر اعلانات کا سہارا لیتے تھے اور وہ کہتے تھے کہ ملک بدری ختم ہو گئی ہے اور جن لوگوں کو ملک بدر نہیں کیا گیا ہے انہیں کھانا دیا جائے گا۔ بھوک کی حالت اور اس بات سے بے خبر ہوکر کہ انہیں موت کی طرف لے جایا جائے گا، کچھ یہودیوں نے اطلاع دی اور انہیں بھی ٹریبلنکا جلاوطن کر دیا گیا۔ ملک بدری کے اختتام کے طور پر، جرمن افواج اور ساتھیوں نے منظم طریقے سے اس وقت کے خالی اپارٹمنٹ گھروں اور کام کی جگہوں کی تلاشی لی تاکہ چھپے ہوئے یہودیوں کو تلاش کیا جا سکے۔

ستمبر 1942 میں  60,000 یہودی یہودی بستی میں باقی رہ گئے تھے۔ جنوری 1943 میں، جرمن SS اور پولیس یونٹس نے وارسا یہودی بستی کے تقریباً 5,000 یہودی باشندوں کو ٹریبلنکا بھیج دیا۔ اس تین روزہ آپریشن کے دوران یہودی بستی کے 1,171 مکینوں کو گولی مار کر ہلاک کر دیا گیا۔

تصویریں

وارسا یہودی بستی کی بغاوت کے دوران جرمن سپاہی یہودیوں کے ایک گروہ پر براہ راست توپوں سے بمباری کرتے ہوئے (تصویریں)

وارسا یہودی بستی کی بغاوت کے دوران جرمن سپاہی یہودیوں کے ایک گروہ پر براہ راست توپوں سے بمباری کرتے ہوئے۔ وارسا، پولنڈ، 19 اپریل-16 مئی، سن 1943۔

کریڈٹس:

• US Holocaust Memorial Museum

• آرکائیوز کی تفصیلات دیکھیں

19 اپریل اور 16 مئی 1943 کے درمیان جرمن SS اور پولیس فورسز نے ٹراونیکی تربیتی کیمپ سے خصوصی طور پر تربیت یافتہ معاون پولیس گارڈز کی بٹالین کی مدد سے وارسا یہودی بستی کو ختم کر دیا گیا۔ جب یہودی باشندوں نے ملک بدری کی ابتدائی کوششوں کے خلاف مزاحمت کی (جسے وارسا یہودی بستی کی بغاوت کے نام سے جانا جاتا ہے)، SS اور پولیس نے ان پر حملہ کر دیا اور پھر درجنوں ہلاکتیں ہوئیں۔ اس کے بعد جرمنوں نے مزاحمت کو توڑنے کے لیے یہودی بستی کو بلاک بلاک کے حساب سے تباہ کر دیا۔ اس آپریشن کے دوران 7,000 سے زائد یہودی، جن میں سے زیادہ تر مزاحمتی جنگجو یا یہودی بستی کے اندر چھپے ہوئے افراد تھے، مارے گئے۔ ان میں سے زیادہ تر کو SS اور جرمن پولیس کے ساتھ لڑائی میں گولی ماری گئی۔ جرمنوں نے تقریباً 7,000 مزید یہودیوں کو ٹریبلنکا اور تقریباً 42,000 کو جنرل گورنمنٹ کے ضلع لوبلن میں حراستی کیمپوں اور جبری مشقت کے کیمپوں میں جلاوطن کر دیا۔ اس گروپ میں سے تقریباً 18,000 یہودیوں کو مجدانیک کیمپ، تقریباً 16,000 کو پونیاٹووا جبری مشقت کے کیمپ اور تقریباً 6,000 کو ٹراونیکی جبری مشقت کے کیمپ میں بھیج دیا گیا۔ بقیہ 2,000 کو جبری مشقت کے چھوٹے کیمپوں جیسے بڈزین اور کراسنک میں ادھر ادھر کر دیا گیا۔

یہودی بستی کو تباہ کرنے کے بعد، SS حکام نے وارسا یہودی بستی کی جگہ پر ایک چھوٹا حراستی کیمپ بنادیا۔